Spjall með fornleifafræðinemum, 2. maí, kl. 17:15

Næsta spjall FFÍ verður í dag, kl. 17:15, á Fornleifafræðistofunni að Ægisgötu 10. Að þessu sinni verður spjallið haldið í sameiningu við Kuml, félag stúdenta í fornleifafræði, en umræðuefnið verður vettvangsnám fornleifafræðinema við HÍ. Rætt verður um hvort breytingar á fyrirkomulaginu séu æskilegar og hver reynsla og viðhorf stúdenta eru.

Boðið verður upp á snakk og léttvín. Við vonumst til að sjá sem flesta og hvetjum einkum stúdenta til þess að koma, enda varðar málið þá sérstaklega!

Athugið breyttan fundarstað!

Fardagablót FFÍ, miðvikudaginn 23. apríl 2008 - síðasta vetrardag

Smellið á myndina til að lesa auglýsinguna 

Eftirmiðdagsspjall FFÍ, 3. apríl 2008, kl. 17:15

Næsta spjall FFÍ verður 3. apríl, kl. 17:15, á kaffihúsinu Babalú á Skólavörðustíg. Að þessu sinni ætlum við að fjalla um ýmsar siðferðislegar spurningar varðandi uppgröft, rannsóknir og sýningu mannabeina. Á sameiginlegum fundi FFÍ og FÍF um gripi fyrir nokkru þó þetta málefni upp í umræðum og okkur þykir rétt að taka það nú sérstaklega fyrir. Spurningarnar sem liggja fyrir eru ýmislegar, t.d.: Á að takmarka uppgröft á mannabeinum? Á að gera kröfur um endurgreftrun mannabeina að loknum rannsóknum? Skiptir máli frá hvaða tímabili mannabeinin eru? Má nota mannabein sem sýningargripi? O.s.frv.

Við vonumst til að sjá sem flesta og alla með skoðanir á málinu.

Eftirmiðdagsspjall föstudaginn 29. febrúar

Næsta spjall FFÍ verður næstkomandi föstudag, þann 29.2. kl. 17:15, á kaffihúsinu Babalú á Skólavörðustíg. Umræðuefnið að þessu sinni eru þýðingar á erlendum hugtökum yfir á íslensku. Borið hefur á því að notaðar séu mismunandi þýðingar á sama hugtakinu bæði innan fornleifafræðinnar sem og innan annarra fræðigreina. Mikilvægt er að sátt komist á um þýðingar svo hefð fyrir notkun þeirra myndist.

Þau hugtök sem fjallað verður um eru m.a.:
Postprocessualism
Agent
Agency
Identity
Materiality

Endilega hugsið málið og látið ykkur detta í hug góðar íslenskar þýðingar á þeim. Einnig ef það eru önnur hugtök sem ykkur finnst vanta þýðingu á, þá má gjarnan bera þau upp á spjallinu.
Við í stjórn FFÍ vonumst til að sjá sem flesta þannig að úr því verði áhugaverðar umræður.

Kveðja,
Stjórn FFÍ

P.S. Athugið breyttan tíma!

Söfnun gripa úr fornleifauppgröftum, 21. febrúar 2008, kl. 20:00

Fornleifafræðingafélag Íslands og Félag íslenskra fornleifafræðinga bjóða alla hjartanlega velkomna á sameiginlegan umræðufund um söfnun gripa úr fornleifauppgröftum.

Á síðustu árum hafa farið fram stórar og smáar rannsóknir þar sem fjöldi gripa hefur verið mjög mikill. Í þessu sambandi hafa vaknað margar spurningar um hverju sé safnað og hvort það eigi að safna öllu og hver taki ákvörðun um það. Þau Kristín Huld Sigurðardóttir, forstöðumaður Fornleifaverndar ríkisins, Lilja Árnadóttir, fagstjóri munadeildar Þjóðminjasafns Íslands, Gavin Lucas, lektor við Háskóla Íslands, og Guðrún Alda Gísladóttir, fornleifafræðingur, Ármann Guðmundson, fornleifafræðingur, munu halda stutt erindi. Að því loknu verða vonandi líflegar umræðum um efni  kvöldsins.

 Umræðufundurinn verður haldinn í kjallara Fornleifaverndar ríkisins fimmtudaginn 21. febrúar, kl. 20:00.

Fornleifafræðingafélögin munu bjóða upp á léttar veitingar.

Aðalfundur FFÍ, 3. janúar, kl. 17:00

Aðalfundur FFÍ verður haldinn þann 3. janúar, kl. 17:00 í kaffistofu Þjóðminjasafns Íslands - Setbergi.

Dagskrá aðalfundar:

1) Skýrsla liðins árs
2) lagðir fram endurskoðaðir reikningar
3) lagabreytingar
4) kosning stjórnar
5) kosnir tveir endurskoðendur
6) önnur mál

Stjórn FFÍ hvetur alla félagsmenn til að mæta á fundinn enda er mikið að gerast nú um stundir í málefnum fornleifafræðinnar og mörg mál sem félagið þarf að taka afstöðu til.

Að loknum fundinum munu félagsmenn hittast á veitingastaðnum Tívolí við Laugaveg 3 og snæða saman kvöldverð í tilefni af nýju ári.

Hádegissjall á Babalú, 1. nóv., kl. 11:30

Næsta spjall FFÍ verður næstkomandi fimmtudag, þann 1.11. kl. 11:30, í kaffihúsinu Babalú á Skólavörðustíg. Umræðuefnið er nokkuð sem kemur öllum fornleifafræðinemum (en líka öðrum fornleifafræðingum) sérstaklega mikið við, þ.e. starfsmöguleikar fornleifafræðinga hérlendis. Við munum ekki aðeins ræða um það hvaða möguleikar eru fyrir hendi í faginu sjálfu heldur langar okkur líka að spjalla um það hverning umsóknum fornleifafræðinga er tekið innan annarra faggreina eða starfa.

Við í stjórn FFÍ vonumst til að sjá sem flesta þannig að úr því verða áhugaverðar umræður.

 

Stjórn FFÍ 

Annað hefti Ólafíu, rits FFÍ er komið út

Út er komið annað hefti Ólafíu, rits Fornleifafræðingafélags Íslands (FFÍ). Í heftinu, sem ber að þessu sinni yfirskriftina Félagatal, eru eingöngu greinar eftir félagsmenn FFÍ. Fjórar greinarnar eru þýddar en þær eru eftir dr. Ólafíu Einarsdóttur, dr. Lotte Hedeager, dr. Anders Andrén og dr. Jesse Byock og samstarfsmenn hans. Þrjár nýjar greinar eru í heftinu en þær eru eftir dr. Bjarna F. Einarsson, Dagnýju Arnarsdóttur og Sigrid Cecilie Juel Hansen. Ritstjórar eru dr. Steinunn Kristjánsdóttir og Vala Björg Garðarsdóttir.

Skrár tengdar þessari bloggfærslu:

• _lafiaii_pic.jpg

Gróska í fornleifarannsóknum á Íslandi - Dagskrá

Félag íslenskra fornleifafræðinga og Fornleifafræðingafélag Íslands halda
ráðstefnu í samvinnu við Þjóðminjasafn Íslands laugardaginn 28. apríl
kl.13:00 í fyrirlestrasal Þjóðminjasafnsins.

13:00 – 13:15 Tvær rústir á Hálsi við Kárahnjúka. Rannsókn vegna
virkjanaframkvæmda á hálendinu norðan Vatnajökuls Garðar Guðmundsson.

13:15 – 13:30 Kot í Rangárþingi ytra. Könnunarskurðir í rústir sem hafa
verið að koma í ljós vegna uppblásturs. Margrét Hrönn Hallmundardóttir

13:30 – 13:45 Útskálar í Sveitarfélaginu Garði. Könnunarskurðir vegna
framkvæmda í þúst norðan við bæjarhól Útskála. Guðrún Alda Gísladóttir

13:45 – 14:00 Litlu Núpar í landi Laxamýri í Aðaldal, S-Þingeyjarsýslu.
Könnunarskurðir í   garðlög,   tóft og möguleg kuml. Howell M. Roberts.

14:00 – 14:15 Búðarárbakki í Hrunamannahreppi. Rannsókn á 17. aldar býli.
Kristján Mímisson

14:30 – 14:45   Hafnarstræti, tónlistar og ráðstefnuhús í Reykjavík.
Rannsókn vegna framkvæmda.
Oscar Aldred

15:00 – 15:30 kaffi

15:30 – 15:45   Hof í Vopnafirði. Rannsókn vegna framkvæmda, á tóft innan
kirkjugarðs. Steinunn Kristjánsdóttir

15:45 – 16:00 Vatnsfjörður við Ísafjarðardjúp. Rannsókn á bæjarstæði.
Guðrún Alda Gísladóttir

16:00 – 16:15 Þórutóftir á Laugafellsöræfum. Tilgangur rannsókna er að
koma með kenningu um aldur og hlutverk Þórutófta. Sandmúli, Bálsbrekka og
Helgastaðir á Krókdal. Uppmæling á rústum og könnunarskurðir. Orri
Vésteinsson

16:30 – 17:00 Rannsókn á kumlum og mannvirkjum í Hringsdal við Arnarfjörð.
Adolf Friðriksson.

Gróska í fornleifarannsóknum á Íslandi - Ráðstefna FÍF og FFÍ

Félag íslenskra fornleifafræðinga og Fornleifafræðingafélag Íslands halda ráðstefnu í samvinnu við Þjóðminjasafn Íslands laugardaginn 28. apríl kl.13:00 í fyrirlestrasal Þjóðminjasafnsins.
    Tæpast hefur farið fram hjá nokkrum manni að óvenjumikið hefur verið um fornleifauppgrefti um allt land á síðastliðnum árum. Er það helst Kristnihátíðarsjóði að þakka en sjóðurinn var stofnaður til að minnast þess að 1000 ár voru liðin frá því að kristinn siður var lögtekinn á Íslandi. Auk þeirra fornleifarannsókna sem hlutu styrki úr Kristnihátíðarsjóði hefur verið ráðist í fjölmargar aðrar rannsóknir, stórar og smáar, sem eru allrar athygli verðar og ekki síður mikilvægar fyrir fræðin.
    Á ráðstefnunni verður að þessu sinni einungis fjallað um þær rannsóknir, sumar hverjar á óvæntum minjastöðum, aðrar til komnar vegna framkvæmda. Sem dæmi má nefna rannsókn á kumli í Hringsdal, á minjum sem hurfu í lónið við Kárahnjúkavirkjun og persónurannsókn á 17.aldar kotbónda. Að öðru leyti vísast til dagskrárinnar.
    Fornleifarannsóknum er ætlað að varpa ljósi á menningararfinn og merka sögustaði. Á ráðstefnunni verður fjallað um fornleifarannsóknirnar í stuttu máli en henni er öðrum þræði ætlað að efla samstarf þeirra sem að fornleifarannsóknum standa.
    Kristnihátíðarsjóður hefur lokið störfum en hann hefur verið mikilvæg hvatning fyrir fræðigreinina. Ýmsir aðrir aðilar hafa sömuleiðis veitt verkefnum á sviði fornleifafræði styrk með ýmsu móti á liðnum árum, s.s. Fornleifasjóður, sveitarfélög, byggðasöfn og Rannís auk þess sem framkvæmdaraðilar hafa á stundum kostað þau.

Ráðstefna er öllum opin og aðgangur ókeypis.